雞肋變雞骨

今日（３／２／０９）終於的起心肝，送左碟炒鮮魷俾個賓賓食。

老婆睇住佢執包袱，越睇越佩服，佢去年十月初先到埗，當時只係帶住一件行李。至今未足四個月，執埋執埋竟然有六大件咁多。

之所以咁決斷，因關係到囡囡的人身安全。早上十點都未夠，愛妻打電話求救兼申訴，話賓賓用廁所門夾親囡囡既手指，兩隻手指又瘀又腫。愛妻當時情急，推開左賓賓，攬實囡囡，質問賓賓點解會咁，佢竟然話唔知，並且一的歉意都無。

事關重大，叫愛妻即時車囡囡到醫院急症室。在醫院同愛妻囡囡匯合時，見囡囡在車內笑著向我伸展手指，便放心了大半，再細心檢查後，自己可斷定只是皮肉之苦，囡囡手指並無骨折內傷，於是連急症也不用看。草草吃過中午飯，便驅車回家叫賓賓執包袱。

冰涷三尺非一日之寒，其實想炒賓賓好耐，但佢擺明就係雞肋，食之無味，棄之可惜。要數佢的衰野真係有排數。

佢去年十月八號抵港，九號到女佣介紹公司接佢時，心中已打個突，佢真人同我印像中既形像容貌相距甚遠。我們揀佢，只因相片同短片中既佢相貌比較端正，而且笑容可掬。點知真人竟然係苦口苦面，瘦瘦削削，樣衰衰咁。個口重好臭添，唔係亂講野果種口臭，而係真真正正既個口有陣臭除。

以貎取人，失諸子羽，但有時單憑樣貎真係可以準確相人既。日常工作佢會做，但又唔係做得咁妥當。做人又唔會主動，講野鬼食泥咁，都唔知佢講乜。愛妻重以為搵個大學畢業既賓賓湊囡囡，等囡囡多的接觸英文，如果囡囡學埋佢咁鬼食泥，就多得佢唔少咯。

話佢唔得主動好似唔多對。佢打斧頭就好主動啦。除左去超巿有單有據佢無計，一去菜巿場佢就生咯，二十蚊一條魚佢報三十蚊數，要佢買二十蚊既佢就整條十五蚊既番黎。不過去街巿唔打斧頭會雷公劈既，算啦，但好心佢打完斧頭都做好的補番數丫，佢偏偏蒸條魚俾我地食到一口魚鱗，話佢，好得幾日，之後又故技重施，故態復萌，真係呢幾個月食既魚鱗，呢世仔都食唔到咁多。

普通既家務，唔提點佢都唔掂。有次抹書架，同我打爛左個千幾蚊既玉石擺設，好彩係流野唔係真古董唧。佢抹地會抹完重係咁污糟，燙褲會每隻腳送多一條骨。廚房抽油煙機油立立咁，唔知佢係咪想証明佢好守規矩，時常都有用抽油煙機。洗菜洗葱係原顆放在水喉下沖下就算。菜頰入面藏污納垢，唔知佢知唔知，結果當然係魚鱗同泥沙相輝映。的生果提子洗完後，佢重識用原來的膠袋裝番放回雪櫃，好有手尾，但原來既膠袋係好污糟辣撻架，大姐。的隔夜餸佢永遠唔會跟住第二日整番黎食。提佢，咪整囉，但攞在餐枱上從無見佢食，佢就真係好識揀飲擇食。更多時候係幾日後攞出黎倒掉。有一次囡囡愛妻同我齊齊肚痾，佢就安然無恙，我估都係同佢整的野污糟有關，佢無痾，只不過係佢污糟慣，抵抗力好啩。

有朝叫佢煎蘿葡糕當早餐，佢好聽話成底蘿葡糕煎晒後，重依舊整幾塊多士添，真係慌死你食唔飽。

咁多問題，我地都只係高調叮囑吩咐指示出警告信，除此外，就係忍。但關係到囡囡安全就是可忍孰不可忍矣。前一日，愛妻同佢入地鐡站下樓時已差點出事。佢地一人一邊提著嬰兒車，囡囡安坐其中，點知呢個賓賓一的力都唔出，愛妻不知就裡，用力一提，車便向賓賓那邊傾側，囡囡差點連人帶車滾下樓梯。當時愛妻已很惱怒，想炒佢，怎知一時猶疑，今日便差點兒斷送了囡囡的兩隻手指。

雞肋頓時變成雞骨，雞肋就話食之無味，棄之可惜。雞骨重使乜考慮，炒之而後快啦。