雜碎

同事投訴我無出blog 好耐, 其實使乜咁認真呀? 搞到親身黎口頭質詢,

搞個blog又無錢收, 又要時間寫野, 又要出賣屋企人以至自己既私隱, 有時重要錄音錄影搞埋數碼, 都好鬼麻煩既,

除左有個地盤可以亂up一通, 隨便發洩下外, 重有乜著數呢? 我又唔係陶傑, 字字千金, 白做, 真係支出與收入不相稱, 老廉幾時請下我飲咖啡? 唔係因為我收規呀! 係因為呢blog 無收入, 連杯咖啡都飲唔起咋., 可憐下啦, 老廉!

自己假假地都係一個藉藉無聞既高官, 官場文化, 投訴喎, 唔應唔得, 今日不如炒下雜碎, 虛應下故事啦.

有個同事早前又話得到今年度既最傑出員工奬, 問我攞禮物喎. 唉, 上台講幾句, 具名多謝呢個多謝果個, 講到我果 part 就 隱隱晦晦的, 唔好話講名, 就連少少提示都無, 人地想估都估唔到啦. 不過, 呢的虛名我唔恨既, 最緊要就係以前曾經確確實實的影响過呢位同事, 種善因, 得善果, 好人自有好報既. 講番禮物呢筆, 我最怕就係送禮物, 要送得合適得體, 要送得時間岩岩好, 係一門大學問, 我才疏學淺, 睇怕點鑽研都不及其皮毛, 與其求求其其, 不如唔送咯. (送禮我唔在行啫, 搵藉口卻係我既強項) 不如咁啦, 我度緊講下我地呢行果的大學生既英文, 題目都已經度埋, 叫 EnglAIRS, 從AIRS (Advanced Incident Report System) 中睇佢地的英文咁解, 佢地的英文好好, 好多值得借鏡學習既地方? 緊唔係啦, 係從佢地既錯誤中學習就真, 一於係我講呢的野既時候提下呢位同事, 作為鼓勵啦.

又有位同事問我呢排係唔係無打機, 因為我長期在排名榜佔頭位既分數已被佢(佢個仔)取代了, 我就緊係回答話無時間玩啦. 其實玩呢的遊戲想要玩到高分, 一命二運三風水, 四有時間五肯玩, 最後先講到技術(如果有的話). 呢兩日假期, 我日砌夜砌, 日打夜打, 結果就不如人意, 硬係扒唔到頭佔唔番領導地位, 俾人問起, 唯有繼續話近日好忙, 無時間玩啦.. 到爭番首位時, 自然另有回應: 好易玩架, 一玩就俾我霸番頭位啦.

又講下豬流感, 由一開始我已經月旦香港的對策及措施, 但香港到而家重係度苟延殘喘, 可能係玩大左唔知點收科啦., 豬流感點會消失丫, 以後會千秋萬世, 與人同在, 共世永存既, 而家暑假完左又一波黎緊, 靠的庸碌官員, 不食人間煙火既專家, 重難收科啦. 區區感冒, 小病而矣, 但香港投放既資源, 財力物力人力, 就好似我寫呢個blog 咁, 與整體的醫療成效不相符, 重繼續黎, 幾時方休, 欲語還休, 但說天涼好過秋.

至於工作間既人事興替, 吾無語, 只借古人話

【先進于禮樂, 野人也; 後進于禮樂, 君子也., 如用之, 則吾從先進.】

『不知三軍之事而同三軍之政, 則軍士惑矣.
不知三軍之權而同三軍之任, 則軍士疑矣.』

「太上, 不知有之;
其次, 親而譽之;
其次, 畏之;
其次, 侮之;
信不足焉, 有不信焉.
悠兮其貴言.
功成, 事遂,
百姓皆謂:: 我自然.」