國慶日特首辭職

明報網上版今早８：１０發出了一段令人振奮既即時港聞，話特首於國慶酒會後辭職．

梁特首如此冥頑不靈剛愎自用戀棧權勢，照計雷劈都唔會走，又點會放棄大好江山？

果然這段新聞很快便更正了，並向讀者致歉．

有如股市霎時破新高，又好快變成見底．搞到老夫既情緒波動大幅起落，一場歡喜一場空，最少浪費咗支香檳，致歉都無用啦．

老編唔知係同梁特首有仇定係同老細有仇，不過無論係老細或特首，睇怕老編都無運行咯．如果係手民之誤，咁就更加死得不明不白．但係，一雞死一雞鳴，自誇公信第一既明報，要請個正義之士，不為百斗米折腰既就難啫，呢個時勢，搵個隨風擺柳牆頭草，排隊由老尖到新田，任揀唔嬲平靚正，重有北朝鮮國博士銜添．

如果今早閣下聽到普世歡騰如春雷乍响，突然間又見人人失魂落魄鴉雀無聲，唔係閣下思覺失調有幻像，都唔係香港人黐咗線，係明報忽然顚咗，將［特首稍後將致辭］變成［特首稍後將辭職］，真係同是一［辭］，影響各異咯．

剪報共享：